सर्मिला रमौली, बागमती-सर्लाहीको बागमतीमा जारी नगरस्तरिय भलिवल प्रतियोगिताको दोस्रो दिन ६ वटा खेल सम्पन्न भएको छ ।
मंगलवारबाट बागमती नगरपालिका–१, मिलनचोक मगर गुम्बा नजिकैको मैदानमा सुरुभएको प्रतियोगिताको दोस्रो दिन ६ खेल सम्पन्न भएको हो । प्रतियोगिता अन्तरगत पहिलो खेलमा आयोजक मिलनचोक यूवा क्लव, दोस्रोमा एभरेष्ट एकेडेमी लालबन्दी विजयी भएको छ । इश्वरपुर नआएपछि मिलनचोक स्वत विजयी घोषित भयो । भने, एभरेष्ट एकेडेमीले लाङघाली क्लव बागमती, लाई पराजित गरेको हो ।
यस्तै प्रतियोगिताको तेस्रो खेलमा गुरुङ समाज बागमती–१, लाई पराजित गर्दै हरैयाको राजदेवी यूवा क्लव विजयी भयो । चौथो खेलमा बसनिया क्लव इश्वरपुरलाई पराजित गर्दै आयोजक मिलनचोक (बि) विजयी भएको छ । पाचौँ खेलमा शंकर दिना यूवा क्लव नआएपछि बडकुर्वा स्वत विजयी घोषणा भयो ।
यस्तै छौठौँ खेलमा बडकुर्वा र हरैयाको राजदेवी यूवा क्लव विच भएको क्वाटर फाईनल खेलमा विजयी हुदै बड्कुर्वा सेमिफाईलनमा प्रवेश गरेको छ । आज भएको खेलमा एभरेष्ट एकेडेमीका अभिषेक चौधरी, हरैया राजदेवीका बिवेक सिङ दनुवार, बसनिया क्लव इश्वरपुरका किरण बछार र बड्कुर्वाका आयुष चौधरी म्यान अफ दि म्याच घोषित हुदै ट्रफि जित्न सफल भए ।
यस पहिला मधेश प्रदेशका सांसद जवाहरलाल कुशवाहको प्रमुख आतिथ्यतामा भएको कार्यक्रममा बागमती नगरपालिकाकी उपमेयर लिला कुमार मोक्तान, बागमती–१, का वडाध्यक्ष गम्भिर सिंङ पाख्रिन, २ का वडाध्यक्ष टेक बहादुर बल, ११ का वडाध्यक्ष प्रदिप आचार्य, समाजसेवी रमेश कुमार निरौला, धन बहादुर आले, दिपक थापा मगर लगाएतको आतिथ्यता रहेको थियो ।
कार्यक्रममा बोल्दै प्रदेश सभा सदस्य कुशवाहले खेल क्षेत्रको विकासको लागि बजेट ब्यवस्थाको पहल गर्ने प्रतिबद्धता ब्यक्त गरे । राष्ट्रका लागि खेलकुद, स्वास्थ्यको लागि खेलकुद भन्ने नारा सहित सुरु भएको भलिवल प्रतियोगिताका विजेताले नगद ३५ हजार र उपविजेता नगद २० हजार सहित कप, मेडल, प्रमाण पत्र हातपार्ने छन् । प्रतियोगितामा उत्कृष्ठ खेलाडिले विधागत पुरस्कार प्राप्त गर्ने आयोजक मिलनचोक यूवा क्लवका अध्यक्ष गोकर्ण रुपाखेतीले जानकारी दिए ।
मौषम प्रतिकुल भएका कारण सर्लाही, बारा र रौतहटको गरेर १८ वटा टिम सहभागि प्रतियोगिताको फाईनल खेल ८ गतेका लागि तय गरिएको छ ।
