सर्लाहीको कौडेना गाउँपालिकाले निर्माण गरेको १५ शय्याको सामुदायिक अस्पतालको उद्घाटन गरिएको छ।
कौडेना– २ फूलपरासीमा निर्माण गरिएको सामुदायिक अस्पतालको मंगलबार संघीय स्वास्थ्यमन्त्री मोहनबहादुर बस्नेत र खानेपानीमन्त्री महेन्द्रराय यादवले संयुक्त रूपमा उद्घाटन गरेका हुन्। गाउँपालिकाको आफ्नै एक करोड ७९ लाख लागतमा निर्माण सम्पन्न अस्पतालको औपचारिक उद्घाटन गरिएको गाउँपालिका अध्यक्ष रूपेशकुमार यादवले जानकारी दिए।
अस्पताल उद्घाटन समारोहलाई सम्बोधन गर्दै स्वास्थ्य तथा जनसंख्यामन्त्री बस्नेतले अहिलेको सरकार जनमुखी रहेको दाबी गरे। सरकारले उपत्यकाका निजी अस्पतालहरूमा विपन्न नागरिकको लागि व्यवस्था भएको निःशुल्क शय्या र औषधी उपचार कार्यान्वयन गरेको उल्लेख गरे। यसबाट वर्षाैँदेखि स्वास्थ्य उपचारबाट वञ्चित विपन्न समूह लाभान्वित भएका उनले बताए।
सो क्रममा खानेपानीमन्त्री यादवले नागरिकलाई स्वच्छ खानेपानीको व्यवस्था गर्न सरकार प्रतिबद्ध रहेको बताए। सर्लाहीका नागरिकले वर्षाैँदेखि आर्सनिकयुक्त पानी पिउनु परिरहेको उल्लेख गर्दै उनले छिट्टै स्वच्छ पानीको व्यवस्था गर्ने आश्वासन दिए।
सम्बोधनकै क्रममा मन्त्रीद्वयले अहिलेको गठबन्धन सरकार नढल्ने दाबी गरेका थिए। यो सरकार निर्धक्कसँग ५ वर्ष चल्ने भन्दै बाहिर हल्ला भएजस्तो अवस्था नरहेको उनीहरूले जिकिर गरे।
अस्पतालमा विशेषज्ञ चिकित्सक नियुक्तिको प्रक्रियासमेत अगाडि बढाएको गाउँपालिका अध्यक्ष रूपेशकुमार यादवले जनाकारी दिए। यो अस्पताल सञ्चालनसँगै जिल्लाको दक्षिण–पश्चिम क्षेत्रका आपतकालीन अवस्थाका बिमारीले समेत स्वास्थ्य सुविधा पाउनेछन्। यसअघि यहाँका बिरामी प्रादेशिक अस्पताल मलंगवा वा पूर्व–पश्चिम राजमार्गका अस्पताल धाउन बाध्य थिए। (साभार : नयाँ पत्रिका)
