राजु तामाङ, बागमती– सर्लाहीको बागमतीमा जारी प्रथम जिरायत कप जिल्ला स्तरीय फुटबल प्रतियोगितामा महाकाली युवा क्लब लालबन्दी र आरएफसी हरिवनले फाइनल खेल्ने भएका छन्।
बिहीबार(आज) हुने फाइनल भिडन्तमा महाकाली युवा क्वब लालबन्दी र आरएफसी हरिवन आमनेसामने हुने भएका हुन् । दुवै टोलीले उपाधि उचाल्ने रणनीति सहित मैदानमा उत्रने जनाएका छन् । महाकाली युवा क्लब लालबन्दी सेमिफाइनल खेलमा बागमती फुटबल एकेडेमी बागमतीलाई सडनडेथमा पराजित गर्दै फाइनलमा प्रवेश गरेको हो ।
यस्तै प्रतियोगिताको पहिलो सेमिफाइनलमा रतनपुर युनाइटेड युथ क्लब बारालाई २–१ गोल अन्तरले पराजित गर्दै आरएफसी हरिवन फाइनलमा प्रवेश गरेको हो । बागमती नगरपालिका–४, स्थित ॐ युवा क्लबको खेल मैदानमा भइरहेको प्रतियोगिताको विजेता टोलीले नगद ५० हजार ५१ रुपैयाँ सहित प्रथम जिरायत कप, मेडल र प्रमाणपत्र प्राप्त गर्ने छ ।
भने, उपविजेता टोलीले नगद २५ हजार ५१ रुपैयाँ सहित शिल्ड मेडल र प्रमाणपत्र प्राप्त गर्ने क्लबका अध्यक्ष जित बहादुर विश्वकर्माले जानकारी दिए । प्रतियोगितामा उत्कृष्ट खेल प्रदर्शन गर्ने खेलाडीहरूलाई विधागत पुरस्कारको समेत व्यवस्था गरिएको आयोजकले जनाएको छ ।
‘‘राष्ट्रका लागि खेलकुद, स्वास्थ्यको लागि खेलकुद’’ भन्ने नारा सहित स्थानीय स्तरमा खेल क्षेत्रको विकास तथा खेलाडीको प्रोत्साहनको उद्देश्य सहित प्रतियोगिता आयोजना गरिएको क्लबले जनाएका हो ।
