ईश्वरपुर–पूर्व पश्चिम राजमार्ग स्थित बाँके जङ्गलमा बोलेरोको ठक्करबाट मोटरसाइकल चालकको ज्यान गएको छ । भने, अर्का एक जना घाइते भएका छन् ।
शुक्रबार जिल्लाको ईश्वरपुर नगरपालिका–१२, घारीबथान तर्फ जाने चोकमा पूर्वबाट फूलजोर तर्फ आँउदै गरेको ज २ प ७९९२ नम्बरको मोटरसाइकललाई नम्बर नखुलेको सेतो रङ्गको बोलेरोले ठक्कर दिएको हो । बोलेरोका ठक्करबाट गम्भिर घाइते भएका मोटरसाइकल चालक महोत्तरीको औरही नगरपालिका–५, श्रीपुर बस्ने २३ वर्षका दिलिप मुखियाको उपचारको क्रममा मृत्यु भएको हो ।
दुर्घटनामा परेका मुखियालाई तत्काल लालबन्दी नगर अस्पताल पुर्याइएको थियो । त्यहाँ सामान्य उपचार पछि प्रादेशिक अस्पताल मलङ्गवामा पुर्याएपछि चिकित्सकले मृत घोषणा गरेका जिल्ला प्रहरी कार्यालय सर्लाहीले जनाएको हो । घटनामा घाइते मोटरसाइकलमा सवार ईश्वरपुर नगरपालिका–५, बस्ने ३३ वर्षका शङ्कर मोक्तानको खुट्टा, ढाड र टाउकोमा चोट लागेको अवस्थामा स्थानीय स्वास्थ्य संस्थामा उपचार भइरहेको छ ।
मृतक युवकको शव परीक्षण पश्चात आफन्तले बुझेर लगेका प्रहरीले जनाएको हो । घटनाको विषयमा अनुसन्धान भइरहेको र ठक्कर दिने सवारीको पहिचानको प्रयास भइरहेको प्रहरीले जनाएको छ ।
