राजु तामाङ, बगमती– सर्लाहीको बागमती र ईश्वरपुरमा भएको छुट्टा छुटै दुर्घटनामा परेर तीन जना घाइते भएका छन ।
सोमबार पूर्व पश्चिम राजमार्ग स्थित बागमती नगरपालिका–११, पुतली चोकमा पिकअपले मोटरसाइकललाई ठक्कर दिएको हो । दुर्घटनामा मोटरसाइकल चालक बागमती नगरपालिका–१२, बथनिया बस्ने भीम साहका छोरा १८ वर्षका कृष्ण कुमार साह र मोटरसाइकलको पछाडि सवार सोही स्थानका अर्जुन चौधरीका १६ वर्षका छोरा गौतम चौधरी घाइते भएका हुन ।
घाइते साहको दाहिने खुट्टा र हातमा चोट लागेको प्रहरीले जनाएको छ । भने, चौधरीको बायाँ हात र दायाँ खुट्टामा चोट लागेको अवस्थामा सभ्यता हेल्थ केयर अस्पताल बागमतीमा उपचार भइरहेको इलाका प्रहरी कार्यालय कर्मैयाले जनाएको हो । बागमतीबाट हरिवन तर्फ जाँदै गरेको ज ८ प ३३२ नम्बरको मोटरसाइकलमा सवार उनीहरूलाई विपरित दिशाबाट आँउदै गरेको ना ४ च ५९४५ नम्बरको पिकअप भ्यानले ठक्कर दिएको थियो ।
प्रहरीले दुर्घटनामा संलग्न पिकअप भ्यान र चालकलाई नियन्त्रणमा राखेको जनाएको छ ।
यस्तै भित्री सडक खण्ड अन्तरगत ईश्वरपुर नगरपालिका–१४, खाल्टे बजारमा मोटरसाइकलको ठक्करबाट एक युवक घाइते भएका छन् । श्रीनगरबाट खाल्टे आँउदै गरेको मधेश प्रदेश ०३–०३२ प ६०४० नम्बरको मोटरसाइकलले साही स्थान बस्ने भोला महतोको १४ वर्षका छोरा शिवम कुमार महतोलाई ठक्कर दिएको हो । दुर्घटनामा परेका महतोको खुट्टा र हातमा चोट लागेको प्रहरीले जनाएको छ ।
घाइते युवकको लालबन्दी स्थित मोडल अस्पतालमा उपचार भइरहेको जिल्ला प्रहरीका प्रवक्ता प्रहरी नायब उपरीक्षक दीपक श्रेष्ठले जानकारी दिए । दुर्घटनामा संलग्न मोटरसाइकल प्रहरीले नियन्त्रणमा राखेको र चालक उपचारमा संलग्न रहेको प्रहरीले जनाएको हो ।
