सर्लाही– शहीदको सम्झनामा सर्लाहीमा पनि आज विभिन्न कार्यक्रम गरी शहीद दिवस मनाइएको छ ।
प्रजातन्त्र स्थापना एवम् पुनःस्थापना लगायत विभिन्न कालखण्डमा स्वतन्त्रताका लागि जीवन अर्पण गरेका शहीदहरुको सम्झनामा २००७ सालपछि हरेक वर्ष माघ १६ गतेलाई शहीद दिवसका रुपमा मनाउने गरिएको छ । माघ १० देखि १६ गतेसम्म विभिन्न कार्यक्रमका साथ शहीद सप्ताह मनाउने घोषणा गरी विविध कार्यक्रम गरिदै आएकोमा सर्लाहीमा पनि विभिन्न कार्यक्रम सम्पन्न गरिएको हो ।
दिवसको अवसरमा जिल्लाको हरिपुर, लालबन्दी, हरिवन, मलङ्गवा लगायतका पालिकाहरूमा शहीदहरुको तस्विर तथा सालिकमा माल्यार्पण कार्यक्रमहरू आयोजना गरिएका थिए । सोही क्रममा हरिपुर नगरपालिका–१, जानकीनगरमा पनि चार जना शहीदको सालिकमा माल्यार्पण गरिएको वडाध्यक्ष नानीबाबु थापाले जानकारी दिए । स्थानीय शहीद परिवार समेतको उपस्थितिमा कार्यक्रम सम्पन्न गरिएका हो ।
यस्तै लालबन्दीमा मदन भण्डारी फाउण्डेसनको आयोजनामा शहीद दिवस कार्यक्रम सम्पन्न गरिएको हो । भने, मलङ्गवा नगरपालिकाको सभाहलमा शहीद दिवसको अवसरमा अन्तरकृया कार्यक्रम सम्पन्न भएको छ । स्वतन्त्रताको माग गर्दा १९९७ सालमा शुक्रराज शास्त्रीलाई माघ १० गते काठमाण्डौको टेकुको पचलीमा, माघ १३ गते धर्मभक्त माथेमालाई सिफलमा र गङ्गालाल श्रेष्ठ एवम् दशरथ चन्दलाई माघ १५ गते शोभा भगवतीमा राणा शासकले मृत्युदण्ड दिएका थिए ।
आज शहीद दिवसको अवसरमा सरकारले सार्वजनिक विदा दिएको छ ।
आजको दिन सम्झना गरे पनि पूरा गर्न हुनुपर्ने जति काम नभएको गुनासो छ । दिवसको दिन हुने औपचारिक कार्यक्रममा जिम्मेवार अधिकारीहरूबाट शहीदको सपना पूरा गर्न लागि परेको प्रतिबद्धता भने निरन्तर आउने गरेको छ ।
